Hetimi zbuloi se pedagogia e Bridgewater High School bombardoi adoleshenten me mesazhe me përmbajtje seksuale, duke çuar në largim përfundimtar nga profesioni
Një mësuese e teknologjisë së ushqimit në Mbretërinë e Bashkuar është përjashtuar përgjithmonë nga profesioni, pasi u zbulua se kishte dërguar mesazhe të papërshtatshme një vajze të mitur. Lianne Barclay, 43 vjeç, e cila punonte në Bridgewater High School në Warrington që prej vitit 2017, kontaktoi adoleshenten jashtë institucionit ku mësonte dhe nisi ta bombardonte me komunikime të përsëritura me përmbajtje seksuale.
Prindërit e vajzës ngritën alarmin në verën e vitit 2019, kur zbuluan mesazhe dhe video të shkëmbyera me mësuesen. Materialet iu dorëzuan policisë, e cila mori në pyetje të dyja palët, por nuk ndërmori veprime të mëtejshme penale. Pavarësisht kësaj, shkolla vijoi hetimet e brendshme dhe Barclay dha dorëheqjen vetëm një muaj më vonë.
Në vitin 2020, rasti iu referua Agjencisë së Rregullimit të Mësimdhënies, e cila evidentoi se komunikimi i mësueses me vajzën kishte karakter seksual, përfshirë nxitjen, pyetje të papërshtatshme dhe komente që synonin afrim emocional dhe seksualizim të situatës. Adoleshentja tregoi se mësuesja i shkruante çdo ditë, ndërsa mesazhet tregonin një marrëdhënie të dëmshme dhe të manipuluar nga ana e saj.
Pas shqyrtimit të provave, autoritetet rregullatore vendosën ta përjashtojnë Barclay përgjithmonë nga profesioni i mësimdhënies. Rasti ka ngritur sërish shqetësime mbi sigurinë e të miturve dhe sjelljet e papranueshme të pedagogëve jashtë mjediseve shkollore.
About the Author
