Kampionë pas 90 vitesh, me model financiar unik dhe stadium jo në standarde, belgët kërkojnë të befasojnë OM-në
Union Saint-Gilloise, kampione e Belgjikës pas plot 90 vitesh mungesë në majë, është gati të presë Marseille në një duel të rëndësishëm të Champions League. Klubi belg, që vetëm këtë sezon debuton në garën më prestigjioze të Europës, ka befasuar me ritme të larta progresi sportiv dhe financiar.
Skuadra e drejtuar nga David Hubert kryeson Jupiler Pro League me 37 pikë, duke u mbështetur te një sulm thuajse perfekt (32 gola në 17 ndeshje) dhe një mbrojtje tejet solide. Në Champions, kanë mbledhur 6 pikë me fitore ndaj PSV dhe Galatasaray, duke mbajtur shanset për fazën e ardhshme.
Sébastien Pocognoli, ndër figurat kyçe të ringritjes, la klubin vetëm pas 10 javësh kampionat për t’iu bashkuar Monacos. Ai mbetet trajneri i parë që i dha Unionit kualifikimin historik në Champions.
Vëllai i Alexis Mac Allister, kampion bote me Argjentinën, po përjeton sezonin e ëndrrave. Kevin është kthyer në shtyllë të mbrojtjes dhe madje ka debutuar me kombëtaren argjentinase. Vlera e tij në treg ka shpërthyer pas paraqitjeve të fundit.
USG po shihet si shembull në Belgjikë: klub me bilanc pozitiv, strategji të zgjuar merkatoje dhe filozofi investimi tek lojtarët me potencial. Vlerat që kërkohen tek çdo futbollist përfshijnë: guxim, angazhim, pasion, integritet dhe modesti.
Edhe pse Marien Stadium mbetet ikonë historike e klubit, ai nuk plotëson kriteret për Champions. Për këtë, ndeshjet e shtëpisë zhvillohen në Lotto Park të Anderlechtit, rivalit të përbetuar. Megjithatë, energjia e tifozëve nuk mungon dhe atmosfera pritet e zjarrtë.
Union Saint-Gilloise tashmë ka treguar se nuk frikësohet nga emra të mëdhenj dhe kërkon të shkruajë kapituj të rinj në Evropë. Marseille është i paralajmëruar; surpriza nga Belgjika është reale.
About the Author
