Pas dëmeve të mëdha në Xhamajkë, ku qindra banesa u rrafshuan dhe qeveria shpalli gjendjen e fatkeqësisë, uragani Melissa ka prekur tokën kubane me erëra që arrijnë deri në 185 km/orë, duke shkaktuar përmbytje masive dhe evakuime në shkallë të gjerë.
Uragani Melissa, i konsideruar një nga stuhitë më të fuqishme të viteve të fundit në Karaibe, ka mbërritur mëngjesin e sotëm në Kubë si një stuhi e kategorisë së tretë, pas kalimit shkatërrimtar në Xhamajkë. Zyrtarët kubanë kanë paralajmëruar për dëme katastrofike në provincat Granma, Santiago de Cuba, Guantánamo, Holguin dhe Las Tunas, ku dhjetëra qytete janë përmbytur dhe mijëra banesa janë dëmtuar rëndë.
Sipas Qendrës Kombëtare të Uraganeve në Miami, Melissa po lëviz me shpejtësi drejt verilindjes, ndërsa forca e erërave të saj mbetet jashtëzakonisht e rrezikshme, me rryma të fuqishme uji që kanë lënë nën ujë pjesë të mëdha të qytetit Santiago de Cuba. Pamjet e publikuara nga mediat vendase tregojnë rrugë të përmbytura, ndërtesa të rrënuara dhe automjete të bllokuara në ujë.
Autoritetet kubane kanë evakuuar mbi 300 mijë persona drejt strehimeve emergjente, ndërsa në Bahama janë dhënë urdhra evakuimi për gjashtë ishuj që rrezikohen nga valët e larta dhe përmbytjet bregdetare.
Në Xhamajkë, pas kalimit të uraganit, qeveria e kryeministrit Andrew Holness shpalli gjithë vendin “zonë katastrofe kombëtare”. Sipas autoriteteve, stuhia shkatërroi mijëra banesa, rrëzoi linja elektrike dhe shkaktoi mungesë të furnizimit me ujë e ushqime në shumë zona. Kryeministri njoftoi ndalimin e abuzimeve me çmimet gjatë periudhës së rindërtimit, ndërsa forcat e emergjencës po kërkojnë ende të mbijetuar nën rrënoja.
Meteorologët e kanë cilësuar Melissën si një përbindësh tropikal me sy stuhie të jashtëzakonshëm, ndërsa paralajmërojnë se do të ruajë fuqinë edhe gjatë kalimit mbi Bahama dhe do të afrohet me Bermudën në ditët në vijim.
Ndërkohë, qeveria britanike ka ngritur një qendër krize për ndihmën e mijëra turistëve të bllokuar në Karaibe, përfshirë rreth 8 mijë shtetas britanikë që ndodheshin në Xhamajkë kur goditi uragani.
Autoritetet meteorologjike theksojnë se edhe pse Melissa është zbritur në kategorinë 3, rreziku nga përmbytjet dhe rrëshqitjet e dherave mbetet ekstrem, duke e kthyer këtë stuhi në një nga më të rrezikshmet e dekadës për Karaibet.
About the Author
