Lajmi u njoftua më 17 tetor nga bashkëshortja e tij; autori novator i lindur në Turka (1934) u nda nga jeta më 14 tetor në White Plains, Nju Jork, duke lënë pas një opus që sfidoi kufijtë e tregimit modern
Yurii Tarnawsky, një nga zërat më novatorë të letërsisë ukrainase në mërgim dhe bashkëthemelues i “New York Group”, ka ndërruar jetë në moshën 91-vjeçare. Sipas njoftimit të bërë më 17 tetor nga bashkëshortja e tij, ai u nda nga jeta më 14 tetor 2025 në White Plains, Nju Jork. Tarnawsky lindi në vitin 1934 në Turka (atëherë Poloni, sot Lviv), emigroi fillimisht në Gjermani në vitin 1944 dhe më pas në Shtetet e Bashkuara në fillim të viteve ’50.
Si poet, prozator, dramaturg, eseist dhe përkthyes, ai zgjeroi horizontet e letërsisë bashkëkohore ukrainase përmes eksperimentimit me strukturën narrative dhe lojës gjuhësore. Ndër veprat e tij më të vlerësuara përmendet trilogjia “The Placebo Effect” me titujt “Like Blood in Water”, “The Future of Giraffes” dhe “View of Delft”, krahas romanit “Three Blondes and Death”, që e konsoliduan si figurë qendrore të modernizmit ukrainas në diasporë.
Përveç krijimtarisë letrare, Tarnawsky pati karrierë të gjatë në IBM, ku punoi si inxhinier elektronik dhe më pas si shkencëtar kompjuterik në projekte përkthimi automatik dhe inteligjencë artificiale; më vonë dha mësim në Universitetin Columbia dhe përfundoi doktoraturë në gjuhësi në NYU. Ky kombinim i kërkimit gjuhësor me teknologjinë ndikoi edhe në vizionin e tij estetik.
Vepra dhe ndikimi i tij, nga poezia te proza eksperimentale, mbeten pikë reference për brezat e autorëve që kërkojnë forma të reja rrëfimi dhe një gjuhë që sfidon rregullat. Homazhet nga komuniteti letrar theksojnë trashëgiminë e tij si poet i madh i gjuhës ukrainase dhe si novator i pandalur.
About the Author
