John Beam, figura e njohur e futbollit kolegjial në Oakland, humbi jetën një ditë pas sulmit, ndërsa policia arrestoi të dyshuarin Cedric Irving Jr.
John Beam, trajneri i njohur amerikan i futbollit kolegjial dhe ish-yll i dokumentarit Last Chance U, ka ndërruar jetë një ditë pasi u qëllua në kokë në kampusin e Laney College në Oakland, ku ai shërbente së fundmi si drejtor atletik. Policia e Oakland-it konfirmoi se sulmi ndodhi të enjten, më 13 nëntor, ndërsa Beam vdiq të premten, më 14 nëntor.
Sipas njoftimeve të mediave lokale, i dyshuari Cedric Irving Jr. është arrestuar në lidhje me ngjarjen. Ai u identifikua nga San Francisco Chronicle, The Press Democrat dhe KTVU, ndërsa hetimet vijojnë për të sqaruar motivet e sulmit. Policia theksoi se incidenti është i izoluar dhe nuk ka rrezik për komunitetin.
Beam ishte një figurë e respektuar në Oakland, me mbi 40 vite karrierë si trajner, edukator dhe mentor për qindra të rinj. Kryetarja e bashkisë, Barbara Lee, e përshkroi atë si një shtyllë të komunitetit, një njeri që kishte ndikuar në jetën e mijëra të rinjve brenda dhe jashtë fushës së lojës.
Trajneri u bë i njohur globalisht pasi ekipi i tij në Laney College u përfshi në sezonin 2020 të dokumentarit të Netflix Last Chance U, që pasqyron jetën dhe sfidat e sportistëve të kolegjeve komunitare. Pas karrierës si trajner, ai u tërhoq nga drejtimi i ekipit në vitin 2024, por vazhdoi punën si drejtor atletik i kolegjit.
Gjatë ngjarjes, kampusi u vendos në izolim të plotë ndërsa policia siguronte zonën dhe kryente verifikimet e para. Lockdown-i u hoq pasi autoritetet konfirmuan se nuk kishte më kërcënim aktiv.
Mediat lokale raportojnë se Irving kishte kaluar dikur nëpër programet sportive të një shkolle ku Beam kishte qenë trajner, por nuk dihet nëse ata kishin një lidhje të drejtpërdrejtë. Policia është ende duke hetuar për të kuptuar marrëdhënien mes tyre.
About the Author
