Në dëshminë e dhënë përpara komisionit hetimor, vëllai i adoleshentit që vrau tri vajza të vogla në Southport rrëfeu frikën e hershme për shpërthimet e dhunës dhe heshtjen që parapriu tragjedinë.
Dion Rudakubana, vëllai i autorit të masakrës së Southport, ka zbuluar në një seancë publike se kishte frikë se vëllai i tij, Axel Rudakubana, mund të vriste dikë nga familja shumë përpara ngjarjes së tmerrshme që tronditi Britaninë në korrik të vitit të kaluar.
Në dëshminë e dhënë përmes lidhjes video nga një vend i fshehtë, Dion tregoi se që në vitin 2022 kishte paralajmëruar për sjelljen e dhunshme të vëllait, i cili, sipas tij, kishte tentuar të sulmonte të atin me thikë. “Kisha frikë se nëse ai do të shpërthente, dikush nga ne do të përfundonte i vdekur. Edhe përpjekja e babait për ta ndaluar mund të kishte pasoja fatale”, tha ai.
Axel Rudakubana, vetëm 17 vjeç në atë kohë, kreu një sulm të përgjakshëm më 29 korrik 2024 gjatë një klase me temë Taylor Swift në qendrën “Hart Space” në Southport. I armatosur me një thikë të blerë në internet, ai sulmoi vajza të vogla që po krijonin varëse, duke vrarë Alice da Silva Aguiar, 9 vjeçe, Bebe King, 6 vjeçe, dhe Elsie Dot Stancombe, 7 vjeçe.
Dion tregoi se Axel kishte treguar shenja të qarta izolimi dhe agresiviteti që pas përjashtimit nga shkolla në vitin 2019. Ai ishte dëbuar nga Range High School në Formby pasi kishte pranuar në linjën ndihmëse “Childline” se kishte sjellë një thikë në shkollë dhe kishte sulmuar brutalisht një bashkëmoshatar. Gjatë marrjes në pyetje nga policia, adoleshenti kishte deklaruar se ishte “mjaft i sigurt që do ta përdorte sërish”.
Sipas dëshmisë së Dionit, pas këtij incidenti, Axel u shkëput plotësisht nga shoqëria dhe familja, duke kaluar në një fazë të errët izolimi dhe shpërthimesh të dhunshme. “Tensionet mes nesh u rritën. Ai më godiste shpesh, por askush nuk mendonte se gjërat mund të përfundonin kështu”, tha ai.
Vëllai i autorit kërkoi që hetimi publik të shqyrtojë nëse institucionet arsimore dhe shëndetësore mund të kishin vepruar ndryshe për të parandaluar tragjedinë. “Shpresoj që kjo të ndihmojë që askush tjetër të mos kalojë nëpër një tmerr të tillë”, përfundoi Dion Rudakubana.
About the Author
