Mes emergjencave nga moti i keq, kryeministri i përgjigjet akuzave për udhëtime private të ministrave duke zhvendosur debatin te lëvizjet jashtë vendit të gazetarit
Teksa Shqipëria po përballet me përmbytje, dëborë dhe vatra zjarri në disa zona, kryeministri Edi Rama ka zgjedhur të reagojë publikisht ndaj akuzave të gazetarit Blendi Fevziu, duke e kthyer debatin në një përplasje personale në rrjetet sociale.
Shkak për reagimin u bënë deklaratat e bëra nga Fevziu në emisionin Opinion, ku ai pretendoi se disa ministra udhëtojnë jashtë vendit për arsye private gjatë fundjavave, ndërsa në televizion shfaqen pamje inspektimesh sikur ata ndodhen në detyrë. Gazetari e cilësoi këtë praktikë si arrogante dhe jashtë standardeve demokratike, veçanërisht në një moment kur qytetarët përballen me rrezik real.
Në një postim të gjatë në Facebook, Rama mohoi akuzat dhe deklaroi se nuk ekzistojnë inspektime fiktive, duke theksuar se çdo udhëtim privat i ministrave kryhet vetëm me leje dhe miratim përkatës. Kryeministri shtoi se pretendimet nuk mbështeten në të dhëna zyrtare dhe janë larg realitetit.
Në vijim, Rama zhvendosi vëmendjen te udhëtimet jashtë vendit të vetë Fevziut, duke publikuar sipas tij të dhëna nga sistemi TIMS, që tregonin lëvizje të gazetarit në vende të Amerikës Latine, në periudha kur emisioni Opinion transmetohej drejtpërdrejt. Ai i paraqiti këto si kundërargument ndaj akuzave për udhëtime private dhe inspektime të inskenuara.
Kryeministri e përshkroi gjithë situatën si një reagim të mbështetur në fakte reale dhe deklaroi se nuk kishte qëllim sulmin personal, por kundërshtimin e asaj që e quajti alarm të rremë. Në fund të reagimit, Rama u shpreh i gatshëm të përballet publikisht për këtë çështje, nëse debati trajtohet seriozisht, duke e cilësuar Fevziun si opozitën e vetme aktive në vend.
Reagimi u shoqërua edhe me publikimin e një liste udhëtimesh të quajtura 6 plus 1 të gazetarit, ndërkohë që situata nga moti i keq në disa zona të vendit vijon të mbetet problematike, me banorë të përballur me përmbytje, izolim dhe vështirësi serioze në qarkullim.
About the Author
