Ekspertët paralajmërojnë: mashtrimet romantike dëmtojnë rëndë shëndetin mendor dhe mund të bëhen shtysë tragjike për viktimat në krizë.
Mashtrimet romantike, që shpesh zhvillohen përmes rrjeteve sociale dhe aplikacioneve të takimeve, po lënë pasoja të rënda tek viktimat. Përveç humbjeve të mëdha financiare, ato përjetojnë një traumë emocionale të thellë, ndjesinë e tradhtisë dhe humbjes së një lidhjeje të besuar. Sipas policisë së Montrealit dhe Sûreté du Québec, këto raste shpesh krahasohen me një dyfishim dhimbjeje: viktimat jo vetëm që mbeten pa para, por ndihen edhe të shkatërruara shpirtërisht.
Specialistët theksojnë se ky kombinim turpi, dhimbjeje dhe izolimi mund të çojë disa persona në mendime vetëvrasëse. Hugo Fournier, drejtues i Shoqatës së Parandalimit të Vetëvrasjeve në Kebek (AQPS), e përshkruan mashtrimin romantik si pikën që e mbush kupën për dikë që tashmë është në vështirësi. Ai thekson se edhe pse nuk ka një lidhje të drejtpërdrejtë shkak-pasojë, ky krim mund të bëhet faktor nxitës fatal.
Për të ndërhyrë, AQPS ka paralajmëruar një fushatë sensibilizuese që pritet të nisë këtë dimër, duke përdorur dëshmi të viktimave për të paralajmëruar përdoruesit e aplikacioneve të njohjeve mbi rreziqet. Qëllimi është që njerëzit të kuptojnë se nuk duhet të turpërohen, por të kërkojnë ndihmë, e cila ekziston dhe është në dispozicion.
Ekspertët këshillojnë gjithashtu disa hapa mbrojtës: të mos i dërgohet kurrë para dikujt që nuk është takuar personalisht, të shmangen marrëdhëniet vetëm virtuale, të bëhen kërkime për fotot e përdorura dhe mbi të gjitha, të flitet me të afërmit kur një situatë duket shumë e mirë, për të qenë e vërtetë.
About the Author
