Autori i dy vrasjeve dhe i marrjes peng të një oficeri burgu përfitoi 7.500 paund kompensim dhe mbulimin e shpenzimeve ligjore, duke shkaktuar reagime të forta politike
Një vrasës i dyfishtë me bindje ekstremiste ka përfituar një dëmshpërblim financiar në Britaninë e Madhe, pasi gjykata konstatoi se izolimi i tij i zgjatur në burg kishte ndikuar rëndë në shëndetin mendor. Bëhet fjalë për Fuad Awale, i dënuar me burgim të përjetshëm për ekzekutimin me armë zjarri të dy adoleshentëve në vitin 2013.
Awale u dënua gjithashtu me gjashtë vite shtesë burg pasi mori peng një oficer burgu, duke e kërcënuar me vdekje dhe duke kërkuar lirimin e predikuesit radikal Abu Qatada. Pas këtij incidenti, ai u transferua në një njësi të posaçme izolimi për të burgosur të rrezikshëm, për arsye sigurie dhe kundërterrorizmi.
Sipas vendimit të Gjykatës së Lartë, trajtimi i tij në burg, ku kishte mbetur pa kontakt me të burgosur të tjerë që nga marsi i vitit 2023, i kishte shkaktuar “depresion të rëndë” dhe kishte shkelur të drejtat e tij sipas nenit 8 të Konventës Evropiane për të Drejtat e Njeriut, që garanton respektimin e jetës private.
Si pasojë, Awale përfitoi 7.500 paund dëmshpërblim, ndërsa shpenzimet ligjore të çështjes, rreth 234 mijë paund, u mbuluan nga taksapaguesit britanikë. Vendimi ka shkaktuar reagime të ashpra politike, me përfaqësues të opozitës që e kanë cilësuar rastin si një fyerje për viktimat dhe një shembull të keqpërdorimit të ligjit.
Autoritetet britanike kanë deklaruar se njësitë e izolimit mbeten një mjet thelbësor për mbrojtjen e sigurisë publike dhe të personelit të burgjeve, ndërsa qeveria ka paralajmëruar se do të rishikojë mënyrën e zbatimit të Konventës Evropiane për të Drejtat e Njeriut në rastet që prekin sigurinë kombëtare.
About the Author
