18-vjeçarja Vikena Greku humbi jetën te Ura e Dajlanit, shoferi dyshohet se ishte i dehur dhe me shpejtësi shumë të lartë
Detaje të reja janë zbardhur nga aksidenti tragjik i ndodhur mbrëmjen e së mërkurës në Durrës, në zonën e njohur si Ura e Dajlanit, ku një automjet ra nga mbikalimi duke shkaktuar humbjen e një jete të re.
Sipas informacioneve zyrtare dhe burimeve nga hetimi, viktimë e këtij aksidenti ka mbetur Vikena Greku, 18 vjeçe, e cila ndodhej si pasagjere në automjet. Shoferi i mjetit është identifikuar si Arbër Xhaxhaj, 26 vjeç, banues në Fier.
Burime policore bëjnë me dije se drejtuesi i automjetit dyshohet se ka qenë nën efektin e alkoolit dhe po lëvizte me shpejtësi shumë të lartë në krahun e lëvizjes Tiranë–Durrës, çka ka çuar në humbjen e kontrollit të mjetit. As barrierat mbrojtëse metalike të aksit rrugor nuk kanë mundur të ndalin automjetin, i cili ka përfunduar poshtë urës.
Si pasojë e përplasjes së fortë, shoferi ka mbetur i plagosur rëndë dhe është transportuar në spital për ndihmë mjekësore. Gjithashtu, dy këmbësorë që ndodheshin pranë zonës së aksidentit, të moshës 33 dhe 35 vjeç, kanë mbetur të dëmtuar, por pas marrjes së ndihmës mjekësore ndodhen jashtë rrezikut për jetën.
Policia njoftoi se aksidenti ka ndodhur rreth orës 22:15 të datës 15 janar 2026, në lagjen nr. 4 të qytetit. Pamjet nga vendngjarja tregojnë dëmtime të rënda të automjetit, ndërsa për nxjerrjen e personave nga mjeti ka qenë e nevojshme ndërhyrja e forcave zjarrfikëse.
Mësohet se në një pjesë të mbikalimit të Urës së Dajlanit po kryheshin punime në njërën korsi dhe zona ishte e pajisur me sinjalistikë dhe tabela paralajmëruese. Nuk përjashtohet mundësia që këto të mos jenë dalluar nga drejtuesi i mjetit për shkak të shpejtësisë së lartë apo gjendjes në të cilën ndodhej.
Grupi hetimor vijon punën për të zbardhur plotësisht rrethanat dhe shkaqet e këtij aksidenti të rëndë, që i mori jetën një vajze 18-vjeçare dhe tronditi opinionin publik.
About the Author
