Rasti i Assane Thiaw ngre pikëpyetje të forta për trajtimin e migrantëve dhe përgjegjësinë institucionale mes Italisë dhe Shqipërisë
Rasti i zhdukjes së Assane Thiaw, një azilkërkues 27-vjeçar nga Senegali, është kthyer në çështje të nxehtë politike në Itali, duke u diskutuar zyrtarisht në Senatin Italian dhe duke ngritur shqetësime serioze mbi trajtimin e migrantëve në Qendrat e Përhershme për Riatdhesim.
Sipas raportimeve të aktivistëve dhe rrjetit “Mai più lager – No ai CPR”, Thiaw kishte qëndruar për rreth nëntë muaj në CPR-në e Milanos. Më 30 tetor 2025, ai u mor nga policia italiane dhe u transferua në kampin e Gjadrit në Shqipëri, një strukturë e menaxhuar nga qeveria italiane që prej vitit 2024 për strehimin e migrantëve.
Gjatë qëndrimit në CPR, aktivistët raportojnë se Thiaw vuante nga probleme serioze të shëndetit mendor. Video të publikuara tregojnë sjellje shqetësuese, izolim, simulim të të ngrënit dhe luhatje të forta emocionale. Azilkërkues të tjerë kanë dëshmuar se ai alternonte episode qeshjeje dhe ulërima pa shkak të dukshëm, duke ngritur alarmin për gjendjen e tij psikologjike.
Vetëm pak ditë pas transferimit në Shqipëri, më 10 nëntor 2025, autoritetet e shpallën Thiaw të papërshtatshëm për qëndrim në CPR-në e Gjadrit dhe e rikthyen në Itali. Që nga ai moment, vendndodhja e tij mbetet e panjohur, duke shkaktuar frikë se ai mund të jetë lënë pa asnjë formë mbrojtjeje apo kujdesi institucional.
Çështja është ngritur zyrtarisht në Senatin Italian nga senatorja Ilaria Cucchi e koalicionit Alleanza Verdi-Sinistra, e cila ka paraqitur një kërkesë për interpelancë drejtuar Ministrit të Brendshëm italian, Matteo Piantedosi. Seanca u zhvillua më 15 janar 2026, ku u kërkuan sqarime mbi kriteret e ndalimit të Thiaw, trajtimin e tij shëndetësor dhe masat e marra për garantimin e sigurisë së tij pas rikthimit në Itali.
Rasti i Assane Thiaw ka rihapur debatin mbi funksionimin e CPR-ve dhe respektimin e të drejtave themelore të azilkërkuesve, veçanërisht atyre me probleme të shëndetit mendor. Pyetja që mbetet pa përgjigje, dhe që po shqetëson si aktivistët ashtu edhe politikën italiane, është një: ku ndodhet sot Assane Thiaw dhe kush mban përgjegjësi për mbrojtjen e tij.
About the Author
