Flakët kanë djegur mbi 5 500 hektarë pyje dhe fusha në jug të Argjentinës, ndërsa autoritetet shpallin alarm të kuq dhe vazhdojnë evakuimet
Një situatë dramatike po përjetohet në jug të Argjentinës, ku zjarre masive pyjore kanë përfshirë rajonin e Patagonisë, duke detyruar mijëra turistë dhe banorë vendas të largohen nga zonat e rrezikuara. Flakët kanë shpërthyer që prej fillimit të javës dhe janë përhapur me shpejtësi për shkak të kushteve të pafavorshme atmosferike.
Sipas autoriteteve, mbi 3 000 pushues janë evakuuar nga qyteti turistik Puerto Patriada, një zonë e njohur pranë liqenit Epuyén, e cilësuar shpesh si Karaibet e Patagonisë. Ky destinacion është shumë i frekuentuar nga turistët britanikë dhe vizitorë të tjerë ndërkombëtarë për shkak të natyrës së paprekur, maleve dhe liqeneve.
Zjarret kanë shkatërruar rreth 5 500 hektarë pyje dhe toka bujqësore në zonën Comarca Andina, një nga pikat më të rëndësishme turistike në zemër të Andeve. Përveç turistëve, edhe dhjetëra banorë lokalë janë detyruar të lënë shtëpitë e tyre, pasi flakët kanë arritur deri në zona të banuara dhe territore të mbrojtura natyrore.
Guvernatori i provincës Chubut, Ignacio Torres, bëri të ditur se rreth 500 persona janë angazhuar në operacionin për shuarjen e zjarreve, përfshirë zjarrfikës, forca sigurie dhe ekipe mbështetëse. Ndihmë shtesë ka ardhur edhe nga ajri, me avionë zjarrfikës të dërguar nga Kili dhe provinca të tjera argjentinase.
Autoritetet kanë shpallur alarm të kuq në disa provinca qendrore dhe jugore të vendit, ndërsa shërbimi kombëtar i menaxhimit të zjarreve paralajmëron për rrezik të lartë të përhapjes së flakëve. Për momentin, raportohet se tre persona rezultojnë ende të zhdukur.
Situata mbetet kritike, ndërsa ekipet në terren po punojnë pa ndërprerje për krijimin e korridoreve mbrojtëse dhe ftohjen e vatrave aktive, në përpjekje për të shmangur pasoja edhe më të rënda për njerëzit dhe mjedisin.
About the Author
