Bilanci i të identifikuarve nga zjarri në Crans-Montana shkon në 24, ndërsa viktimat më të reja janë vetëm 14 dhe 15 vjeç
Autoritetet zvicerane kanë identifikuar edhe 16 viktima të tjera nga zjarri shkatërrues që përfshiu barin Le Constellation në resortin alpin të Crans-Montana natën e Vitit të Ri, duke e çuar në 24 numrin total të personave të identifikuar deri tani. Sipas policisë së kantonit Valais, shumica e viktimave janë adoleshentë, ndërsa viktima më e re është një vajzë zvicerane vetëm 14 vjeçe.
Nga 16 viktimat e identifikuara së fundmi, nëntë janë nën moshën 18 vjeç. Mes tyre janë 10 shtetas zviceranë, dy italianë, një person me shtetësi italo-emirate, një rumun, një francez dhe një shtetas turk. Autoritetet nuk kanë bërë publikë emrat e viktimave, për respekt ndaj familjarëve.
Zjarri në barin e njohur për të rinjtë në këtë zonë turistike mori jetën e gjithsej 40 personave, ndërsa hetimet janë ende në vazhdim për të identifikuar viktimat e mbetura. Ambasadori italian në Zvicër ka deklaruar më herët se procesi i identifikimit po ecën ngadalë për shkak të djegieve të rënda që kanë pësuar trupat e viktimave.
Sipas hetimeve paraprake, shkaku i mundshëm i zjarrit lidhet me fishekzjarrë dekorativë mbi shishe, të cilët janë afruar shumë pranë tavanit gjatë festimeve të Vitit të Ri. Prokuroria ka nisur një hetim penal ndaj drejtuesve të lokalit Le Constellation, të dyshuar për vrasje nga pakujdesia, plagosje nga pakujdesia dhe zjarrvënie nga pakujdesia.
Hetuesit po verifikojnë gjithashtu nëse materialet izoluese akustike në tavan kanë përmbushur standardet e sigurisë dhe nëse ato kanë luajtur rol në përhapjen e shpejtë të flakëve. Policia ka bërë të ditur se puna për identifikimin e plotë të viktimave dhe të plagosurve po vijon, ndërsa komuniteti lokal dhe familjarët e viktimave mbeten në zi për njërën nga tragjeditë më të rënda të viteve të fundit në Zvicër.
About the Author
